ខេត្តព្រះវិហារ៖ នៅថ្ងៃទី០៦ ខែឧសភានេះ សាលាដំបូងខេត្តព្រះវិហារបានចេញសេចក្ដីថ្លែងការណ៍មួយទាក់ទងនឹងការលើកឡើងរបស់គណនីហ្វេសប៊ុក Ah Da Sakada ដែលគេស្គាល់ថាជាអ្នកនិពន្ធទំនុកច្រៀង និងជាតារាចម្រៀងមួយរូប ដែលបានបង្ហោះសារពាក់ព័ន្ធនឹងចំណាត់ការរបស់អយ្យការអមសាលាដំបូង និងសាលាដំបូងខេត្តព្រះវិហារ។ 

គួរបញ្ជាក់ថា កាលពីថ្ងៃទី០៤ ខែឧសភាកន្លងទៅនៅលើគណនីហ្វេសប៊ុកផ្ទាល់ខ្លួនរបស់តារាចម្រៀង Ah Da Sakada បានបង្ហោះសារយ៉ាងដូច្នេះថា៖ "បេីមានរឿង​ ឬបញ្ហាលេីកក្រោយ​ ជៀសបានជៀសទៅរឿងប្តឹងផ្តល់ឡេីងតុលាការនេះ​ ខ្ញុំសូមសម្តែងការអស់ជំនឿចិត្តលេីដំណេីរការរឿងក្តីប៉ុនប៉ងមនុស្សឃាតដោយចេតនាមកលេីរូបខ្ញុំ​ របស់តុលាការខេត្តព្រះវិហារ​ ! ខ្ញុំបានដាក់ពាក្យបណ្តឹង​ អមជាមួយវត្ថុតាងកាំបិតបុ័ងតោដែលជនសង្ស័យព្យាយាមចូលមកកាប់សម្លាប់ខ្ញុំ​ និងសាក្សីនៅកន្លែងកេីតហេតុ​តែគ្មានចំណាត់ការណាមួយទៅលេីជនសង្ស័យសោះ​ដោយបណ្តោយអោយជនសង្ស័យដេីរហេីរសេរី​ អ្វីដែលកាន់តែហួសចិត្ត​គឺគ្រួសារជនសង្ស័យបានដាក់ពាក្យប្តឹងបកមកខ្ញុំវិញពីបទបរិហារកេរ្តិ៍ជាសាធារណៈ​ ទាំងដែលដេីមបណ្តឹងអត់នៅក្នុងហេតុការណ៍ហ្នឹងសោះ! ខ្ញុំប្តឹងពីបទប៉ុនប៉ងមនុស្សឃាត​ តែដីកាចេញមកបែជា​បទ “គំរាមគំហែង​“ ! ខ្ញុំជាជនរងគ្រោះដាក់ពាក្យបណ្តឹងមុនជនសង្ស័យ​ តែរឿងក្តីខ្ញុំអូសបន្លាយជាងមួយឆ្នាំមិនទាន់ទទួលបានការជំនុំជំរះ​ ខុសពីជនសង្ស័យ​ដាក់បណ្តឹងក្រោយខ្ញុំ​ ក្លែងរឿងពីខ្មៅមកស​ បែជាទទួលបានការជុំនំជំរះមុនខ្ញុំ​ ! ប្រាប់ត្រង់​ ខ្ញុំអង្គុយសេីចមួយខែហេីយ​ នៅពេលដែលរឿងអយុត្តិធម៌នេះធ្លាក់មកលេីរូបខ្ញុំព្រោះខ្ញុំធ្លាប់តែឃេីញក្នុងរឿងភាពយន្ត​ តែថ្ងៃនេះខ្ញុំភ្លឺភ្នែកលេីការអនុវត្តច្បាប់​របស់តុលាការយុត្តិធម៌​ ! ខ្ញុំអស់ជំនឿចិត្តហេីយ​ ឱមាតុភូមិដ៏ផូផង់អេីយ​ អ្នកជាប្រទេសកាន់ព្រះពុទ្ធសាសនា​ តែហេតុអ្វីបានជាមនសិការបស់មន្រ្តីខ្លះនៅតែមិនមានភាពសច្ចៈទៀងត្រង់សម្រាប់ជាតិមាតុភូមិខ្លួនឯងបែបនេះ​ ? បេីជាអ្នកអនុវត្តច្បាប់មិនឈរលេីគោលការណ៍យុត្តិធម៌ផង​ តេីកូនចៅសង្ឃឹមអីទៀត? ត្រូវរស់កំដរថ្ងៃស្លាប់ទាំងគ្មានច្បាប់គ្មានទម្លាប់បែបនេះមែនទេ? បេីPost នេះមិនមែនជាការពិត​ ខ្ញុំសូមដាក់បណ្តាសារខ្លួនឯងអោយស្លាប់តៃហោងយ៉ាងវេទនា​ "បេីមានទោសដោយសារពាក្យពិតទាំងនេះ​ ចាប់ខ្ញុំដាក់គុកចុះ​ យ៉ាងច្រេីនចេញពីគុកវិញខ្ញុំនឹងប្រាប់កូនចៅតជំនាន់ថា​ បេីគេដេញកាប់កូន​ របួសធ្ងន់ប៉ុណ្ណាក៏ដោយ​ កូនទៅពេទ្យហេីយកុំប្តឹងផ្តល់គេ​ ប្រយ័ត្នប្តឹងគេហេីយជាប់គុកដូចពុក​"។ ក្នុងនាមជាប្រជាជនស្លូតត្រង់ម្នាក់​ ខ្ញុំសំណូមពរឱ្យរដ្ឋមន្រ្តីក្រសួងយុត្តិធម៌មេត្តាត្រួតពិនិត្យឡេីងវិញលេីការអនុវត្តច្បាប់របស់មន្រ្តីតុលាកា​រ​ បេីមិនដូចច្នោះទេ​ ប្រជាជនស្លូតត្រង់នឹងចុះនរកទាំងរស់ហើយ"។ 

ទាក់ទងនឹងករណីខាងលើនេះ អ្នកនាំពាក្យសាលាដំបូង និងអយ្យការអមសាលាដំបូងខេត្តព្រះវិហារបានធ្វើការបំភ្លឺទាក់ទងនឹងការលើកឡើងនេះថា ចំពោះសំណុំរឿងដែលពាក់ព័ន្ធនឹងឈ្មោះ ទ្រី សក្កដា ភេទប្រុស អាយុ៣០ឆ្នាំ និងឈ្មោះ វ៉ាន់ ប៊ីលី ភេទប្រុស អាយុ១៨ឆ្នាំ គឺជាសំណុំរឿងព្រហ្មទណ្ឌដាច់ដោយឡែកពីគ្នាចំនួន ២គឺ សំណុំរឿងព្រហ្មទណ្ឌលេខ ១១២ ចុះថ្ងៃទី១៧ ខែមីនា ឆ្នាំ២០២៣ និងសំណុំរឿងព្រហ្មទណ្ឌលេខ ២១៥ ចុះថ្ងៃទី២៩ ខែឧសភា ឆ្នាំ២០២៣ ដែលសាលាដំបូង និងអយ្យការអមសាលាដំបូងខេត្តព្រះវិហារបានមានចំណាត់ការដាច់ដោយឡែកពីគ្នាតាមនីតិវិធី។ 

អ្នកនាំពាក្យសាលាដំបូង និងអយ្យការអមសាលាដំបូងខេត្តព្រះវិហារ បានបញ្ជាក់ជូនសាធារណជនឱ្យបានជ្រាបថា សាលាដំបូង និងអយ្យការអមសាលាដំបូង បានចាត់ការលើសំណុំរឿងព្រហ្មទណ្ឌទាំងពីរខាងលើបានយ៉ាងត្រឹមត្រូវតាមនីតិវិធីច្បាប់ និងក្នុងអំឡុងពេលសមរម្យដោយមិនអូសបន្លាយនីតិវិធី មិនមានការក្លែងរឿងពីស ទៅខ្មៅ ឬមិនឈរលើគោលការណ៍យុត្តិធម៌ដូចការចោទប្រកាន់នោះឡើយ។ 

សូមអានសេចក្ដីថ្លែងការណ៍របស់សាលាដំបូង និងអយ្យការអមសាលាដំបូងខេត្តព្រះវិហារដែលមានខ្លឹមសារលម្អិតដូចខាងក្រោម៖